www.trassg.com
Orixen
Páxina Principal

Trassg, los oríxenes.

Trassg ye un trasgu que paez un muñecu. La so vida yera más o menos tranquila hasta q'una neña entró na tienda onde vivía y lu compró, entós entamó'l viaxe que'l mesmu nos cuenta. Trassg tien un don especial pa detectar a los humanos y cuando nun tan cerca cobrar vida, ye nesi momentu cuando, ente otres coses, aprovecha pa escribir la so historia y publicala n'internet.


Les fueyes de los árboles de la viesca sirven d'abellugu a Trassg. Abellugu como casa cuando sal de la suya ,pero abellugu tamién pola seguridá que-y dan les tres rames máxiques que lleva na mano.

La edá de Trassg nun se conoz, pero los sos güeyos vieron munches,munches coses que dacuando, cuando-y apetez, cuénta-yles a quien quier escuchar. Como'l rellumu que-y españó nos güeyos na nueche de San Xuan na que recoyó les rames de tres de los árboles máxicos d'Asturies:castañu,texu y carbayu.

La rama de castañu da-y la enerxía necesaria pa la vida cotidiana,como'l mesmu frutu del castañu dió a munchos de los habitantes d'Asturies ,cuando los años de fame, y a falta de patates bones yeren castañes.

Y a vegaes tovía recuerda y diz mirando pa los maxestuosos castaños :

¡Cuánta fame quitásteis!

La rama de carbayu da-y la vitalidá que tresmite l'árbol , la fortaleza digna de guerreros como los que llucharon escontra los musulmanes y qu'adoptaron les fueyes del carbayu como símbolu de la so fortaleza tresformada en realeza.




Y finalmente'l texu,l'árbol sagráu d'Asturies siempre presente na historia de los asturianos, de la so íntima relación cola madre tierra.Testigu de les reuniones a la puerte les capilles,de los conceyos abiertos,de los ritos funerarios.La rama que-y da la inmortalidá.

Tres rames máxiques que lleva siempre con él ,nun puede separtase d'elles. En casu perdeles dexaría de ser Trassg pa quedar en simple muñecu. Poro les cuida como a la so propia vida,ya qu'elles son la so propia esencia.Pero equí, como en toles histories, siempre hai fuerces del mal qu'intenten torgar la felicidá y Trassg nun diba ser la excepción. Hai daquién que quier terminar con él y pa ello tien que quita-y les rames, ya que con elles xunta tolos poderes que lu faen invencible.¿Invencible? Toos tenemos un puntu flacu y Trassg tamién lu tien...














































Tolos drechos reservaos. (c) Xosé Ramón Martín Ardines & Anxan Martín Arango - Diseñu Web: PAFF Estudios S.L.L. - Semeya de fondu: www.joseramongarcia.es

d